چاپه فریب چاپه دوکو وخوړه!

چا په فریب وخوړه، چاپه دوکو وخوړه

چې حیا نه پیژنی ، دنیا هغو وخوړه

چا د ورورۍ په نامه ، پردی کورونه لوټ کړه

چا دیارۍ په نامه ، پردی مالونه لوټ کړه

چا په چل ول وخوړه ، چا په نخرو وخوړه

چې حیا نه پیژنی ، دنیا هغو وخوړه

چا دپیسو د پاره ، خپل غیرتونه خرڅ کړه

دی ځینو ځینو په کې ، خپل ایمانونه خرڅ کړه

چا په شملو وخوړه ، چا په پټکو وخوړه

چې حیا نه پیژنی ، دنیا هغو وخوړه

څوک فریبونه کوی ، دفقیرۍ په جامه

پردی جیبونه وهی ، دملنګۍ په جامه

چا په ٫پیرۍ ، وخوړه ، چا په ،تسبو ، وخوړه

چې حیا نه پیژنی ، دنیا هغو وخوړه

چا خپل اولس بیعه کړو ، چا ،ممبری ، خرڅه کړه

چا ټول دفتر تالا کړو ، چا ،افسری ،خرڅه کړه

چا په قلم وخوړه ، چا په ، کرسو ،وخوړه

چې حیا نه پیژنی ، دنیا هغو وخوړه

چې شی قربان په مینه ، هغه یاران چرته دی

وخت دې بدل ، لا یقه ، اوس صادقان چرته دی

چا د پښتو په نامه ، چا په پښتو وخوړه

چې حیا نه پیژنی ، دنیا هغو وخوړه

لایق زاده لایق